Arsenal virðist vera að gefast upp á því að bíða eftir því að Roma geri almennilegt tilboð í Granit Xhaka, miðjumann félagsins. Nú greinir The Athletic frá því að Arsenal vilji gera nýjan samning við leikmanninn. Þetta tekur áreiðanlegi blaðamaðurinn Fabrizio Romano undir.

Hinn 28 ára gamli Xhaka er samningsbundinn Arsenal til ársins 2023.

Hann hefur verið orðaður við Roma í allt sumar. Það er meira að segja talið að hann hafi þegar náð samkomulagi við ítalska félagið um eigin kjör.

Þar sem Roma er þó ekki tilbúið til þess að greiða þá upphæð sem Arsenal biður um reynir enska félagið nú að sannfæra leikmanninn um að gera nýjan samning í Norður-Lundúnum.

Xhaka var frábær með svissneska landsliðinu á Evrópumótinu í sumar. Verðmiðinn á honum er talinn hafa hækkað við það. Það gæti verið ástæðan fyrir því að Roma getur ekki reitt fram þá upphæð sem Arsenal vill.