Breiðablik er komið áfram í 3. umferð Sambandsdeildarinnar eftir 2-1 sigur á Austria Vín á Kópavogsvellinum í kvöld. Breiðablik vinnur einvígið 3-2 samanlagt en fyrri leikur liðanna endaði með 1-1 jafntefli í Austurríki. Kristinn Steindórsson skoraði fyrra mark Blika á 6. mínútu eftir fyrirgjöf frá Höskuldi Gunnlaugssyni. Kristinn lagði svo upp annað markið fyrir Árna Vilhjálmsson sem skoraði á 25. mínútu.
Dominik Fitz nýtti sér slæm mistök í varnarleik Breiðabliks og minnkaði muninn í 3-2 samanlagt en þar við sat og Breiðablik er þá eina íslenska liðið sem er eftir í keppninni.
Breiðablik mætir skoska liðinu Aberdeen í þriðju umferð forkeppninnar. Leikirnir fara fram 5. og 12. ágúst næstkomandi.
Lokatölur:
Breiðablik 2 – 1 Austria Wien
1-0 Kristinn Steindórsson (‘6)
2-0 Árni Vilhjálmsson (’25)
2-1 Dominik Fitz (’68)
