Englendingar eru léttir í lund á Evrópumótinu, gott gengi innan vallar og góð stemming utan hans skipta miklu máli þegar mótið er langt og strangt.

Englendingar mæta Dönum í undanúrslitum á morgun en liðið hefur unnið fjóra leiki og gert eitt jafntefli í fimm leikjum. England á eftir að fá á sig mark í keppninni.

Utan vallar hefur lífið verið ljúft, þann 23 júní fékk enska liðið einkatónleika á æfingasvæði sínu. Harry Kane fyrirliði liðsins hafði tekið upp tólið og beðið vin sinn Ed Sheeran um að koma. Tónlistarmaðurinn vinsæli elskar fótbolta og var meira en klár í slaginn.

Tónleikarnir fóru fram sex dögum fyrir leik Englands gegn Þýskalandi í 16 liða úrslitum, enska sambandið reddaði því bjór fyrir mannskapinn. Leikmenn Englands gátu fengið sér Bud Light á krana en ekki voru allir sem stukku á boðið.

Ensk blöð fjalla um gott andrúmsloft í hópnum en grillveislur og ís skiptir þar máli, á sunnudaginn kom ísbíll á svæðið og leikmenn gátu gert sér glaðan dag.

Englendingar vona að góð stemming utan vallar skili liðinu alla leið en mikill meðbyr er með enska liðinu.