Danska knattspyrnusambandið gaf út yfirlýsingu í morgun um Christian Eriksen. Þar er sagt að rætt hafi verið við Christian Eriksen og að ástand hans sé stöðugt. Hann sendi kveðju á liðsfélaga sína.

Eins og flestir, ef ekki allir, vita þá hneig Eriksen niður í leik með danska landsliðinu gegn Finnlandi á Evrópumótinu í gær. Hann andaði hvorki né var með púls um tíma og þurfti læknalið að beita hjartahnoði. Til allrar hamingju komst Eriksen þó aftur til meðvitundar og gat bæði talað og andað eftir að hafa verið fluttur á sjúkrahús.

Knattspyrnusambandið segir að leikmaðurinn verði eitthvað áfram á sjúkrahúsi vegna rannsókna. Það þakkar einnig öllum þeim sem hafa sent leikmanninum og liðinu hlýjar kveðjur. Hér fyrir neðan má lesa yfirlýsingu danska knattspyrnusambandsins í heild:

Í morgun töluðum við Christian Eriksen. Hann hefur sent kveðju á liðsfélaga sína. Ástand hans er stöðugt og mun hann vera áfram á sjúkrahúsi til frekari rannsókna. 

Leikmenn og starfsfólk landsliðsins hafa fengið áfallahjálp og munu áfram vera til staðar fyrir hvort annað eftir atvik gærdagsins. 

Okkur langar að þakka öllum þeim sem hafa sent hjartnæmar kveðjur á Christian Eriksen. Allt frá stuðningsmönnum, leikmönnum, konungsfjölskyldum Danmerkur og Bretlands, knattspyrnusamböndum, knattspyrnufélögum og fleirum. 

Við hvetjum alla til þess að senda kveðjur á danska knattspyrnusambandið. Við munum sjá til þess að þær skili sér allar til Christian og fjölskyldu hans.