Simon Kjær, fyrirliði danska landsliðsins, sýndi svo sannarlega að hann er starfi sínu vaxinn í kjölfar þess að liðfélagi hans hneig niður í leik gegn Finnum á Evrópumótinu í gær.

Eins og flestir, ef ekki allir, vita þá hneig Christian Eriksen niður í leik með danska landsliðinu gegn Finnlandi á Evrópumótinu í gær. Hann andaði hvorki né var með púls um tíma og þurfti læknalið að beita hjartahnoði. Til allrar hamingju komst Eriksen þó aftur til meðvitundar og gat bæði talað og andað eftir að hafa verið fluttur á sjúkrahús.

Kjær gerði allt rétt í kjölfar atviksins. Hann fór að Eriksen og passaði að leikmaðurinn gleypti ekki tunguna er hann lá meðvitundarlaus. Kjær passaði einnig að líkamsstelling liðfélagans væri rétt.

Er læknalið mætti á staðinn fékk fyrirliðinn aðra liðsfélaga sína til að mynda mennskan vegg í kringum Eriksen til þess að passa að ekki væri hægt að mynda það sem var um að vera.

Kjær tók svo á móti konu Eriksen og reyndi að hughreysta hana á hræðilegu augnabliki.

Kjær er ein af hetjum gærdagsins. Hann átti án efa sinn þátt í því að Eriksen var bjargað. Sannur fyrirliði.