Sviss og Wales mættust í A-riðli Evrópumótsins í fyrsta leik dagsins. Leikið var í Bakú í Aserbaídsjan og lauk leiknum með jafntefli.

Sviss var betri aðilinn í fyrri hálfleiknum en tókst ekki að skora. Staðan í leikhléi var markalaus.

Fyrsta markið kom þó snemma í seinni hálfleik. Þar var að verki Breel Embolo fyrir Sviss. Hann skoraði með skalla eftir hornspyrnu sem tekin var af Xherdan Shaqiri.

Wales tókst að jafna þegar stundarfjórðungur lifði leiks. Kieffer Moore skoraði þá með góðum skalla eftir sendingu Joe Morrell.

Mario Gavranovic, leikmaður Sviss, kom boltanum í netið á 84. mínútu. Það mark var þó dæmt af vegna rangstöðu. Notast var við myndbandsdómgæslu.

Hvorugu liðinu tókst að finna sigurmark. Lokatölur 1-1.

Þessi lið eru í riðli með Ítalíu og Tyrklandi. Fyrrnefnda liðið vann einvígi þeirra í fyrsta leik riðilsins í gær.