Finnland vann Danmörku í B-riðli Evrópumótsins í leik sem er nýlokið á Parken í Kaupmannahöfn. Leikurinn féll þó í skugga þess þegar Christian Eriksen féll til jarðar í lok fyrri hálfleiks.

Staðan var markalaus á 40. mínútu þegar mjög drungalegt atvik kom upp. Christian Eriksen féll til jarðar og það þurfti að beita skyndihjálp. Það var lítið um að vera þegar Eriksen féll til jarðar og fljótt kom í ljós að um eitthvað alvarlegt væri að ræða. Sjúkrastarfsmenn mættu á staðinn og beittu hjartahnoði. Það kom svo í ljós síðar, til mikillar hamingju, að Eriksen væri vaknaður eftir að hafa verið fluttur á sjúkrahús.

Mikið hefur verið fjallað um málið á 433.is síðustu klukkustundir og er hægt að nálgast meira á síðunni.

Að leiknum. Leiknum var haldið áfram eftir langt hlé. Síðustu fimm mínútur fyrri hálfleiks voru spilaðar og svo kom hálfleikur. Markalaust.

Joel Pohjanpalo kom Finnum yfir á 59. mínútu gegn gangi leiksins. Þetta var fyrsta mark Finna á stórmóti, enda þeirra fyrsti leikur á stórmóti. Pohjanpalo fagnaði ekki mikið í ljósi aðstæðna.

Danmörk fékk tækifæri til að jafna á 74. mínútu er þeir fengu víti. Pierre-Emile Hojbjerg steig á punktinn en Lukas Hradecky varði frá honum. Dönum tókst ekki að jafna. Lokatölur 0-1.

Dýrmæt þrjú stig fyrir Finna. Leikurinn gegn Belgum þann 17. júní er nú orðinn ansi mikilvægur fyrir Dani.