Harry Kane, framherji Tottenham, mun ekki hlusta á nein samningstilboð frá félaginu í sumar. Þetta segir Fabrizio Romano.

Kane hefur verið mikið í umræðunni á dögunum en hann vill komast í burt frá Tottenham eftir sautján ár hjá félaginu. Chelsea, Manchester United og Manchester City hafa öll verið nefnd til sögunnar sem hugsanlegur áfangastaður fyrir enska landsliðsmanninn. Eins og er er það síðastnefnda talið líklegast til þess að hreppa hann. Sergio Aguero, framherji City, fer frá félaginu í sumar eftir tíu ár og það þarf að fylla hans skarð.

Kane er sagður hafa tilkynnt Daniel Levy, framkvæmdarstjóra Tottenham, það að hann muni ekki fara í viðræður um nýjan samning við félagið. Á hinn bóginn segir Romano að svo gæti vel farið að Levy muni ekki taka það í mál að hlusta á tilboð í sinn besta leikmann. Það gæti því komið upp áhugaverð staða innan félagsins í sumar.

Tottenham mætir Leicester í dag í lokaumferð ensku úrvalsdeildarinnar. Það er spurning hvort að um sé að ræða síðasta leik Kane í búningi félagsins.