Harry Kane framherji Tottenham vonast til að geta átt heiðarlegt samtal við Daniel Levy stjórnarformann félagsins um framtíð sína í sumar. Kane tjáir sig í fyrsta sinn um málið í viðtali við Gary Neville.

Kane er sagður vilja ólmur fara frá Tottenham í sumar og miðað við hvernig Kane talar eru allar líkur á að hann fari fram á sölu. Manchester City, United og Chelsea hafa öll áhuga.

„Ég veit það ekki, hann (Daniel Levy) gæti viljað selja mig. Hann gæti hugsað um það ef það kemur 100 milljóna punda tilboð. Ég verð ekki þess virði eftir tvö eða þrjú ár,“ sagði Kane um Daniel Levy.

„Ég vona að samband okkar sé það gott, ég hef gefið félaginu allt í 16 ár. Ég vona að við getum átt heiðarlegt samtal og séð hver staðan er.“

Kane talar eins og hann vilji fara frá Spurs í sumar. „Ég vil ekki klára ferilinn og sjá eftir einhverju, ég vil verða eins góður og ég get orðið. Ég hef sagt það áður, ég hef aldrei sagt að ég klári ferilinn með Tottenham og ég hef aldrei sagt að ég væri á förum.“

„Ég tel mig eiga nánast annan feril eftir, ég á 7 eða 8 ár eftir. Ég er ekki að flýta mér, ég er ekki stressaður yfir þessu. Ég tel mig eiga meira inni, ég tel mig geta orðið betri. Ég tel að ég geti skilað betri tölum en ég geri þessa stundina.“

„Ég er ekki hræddur við að segja það að ég vil verða sá besti, ég vil komast á sama stall og Ronaldo og Messi komust á. Að vinna titla og skora 50-70 mörk yfir tímabilið. Það er markmiðið mitt.“