Það vakti verulega athygli fyrr í vikunni þegar það kom í ljós að Daði og Gagnamagnið sem keppir fyrir hönd Íslands í Eurovison fékk forgang í bólusetningu. Þórólfur Guðnason sóttvarnalæknir og hans fólk ákvað að bólusetja hópinn þrátt fyrir að viðmiðin séu önnur.

Hefur þetta reitt margan manninn til reiði og sérstaklega fólk í afreksíþróttum, þeir einstaklingar þurfa nú að ferðast um Evrópu í þeirri von um að eiga möguleika á miða á Ólympíuleikana í sumar en Þórólfur hefur látið hafa eftir sér að sá hópur fá ekki forgang.

„Af­reksíþrótta­fólkið okk­ar er besta land­kynn­ing sem við eig­um. Svo ég tali nú ekki um for­varn­ar- og lýðheils­u­starfið sem þetta fólk vinn­ur, bæði meðvitað og ómeðvitað,“ skrifar Bjarni Helgason blaðamaður á Morgunblaðinu reiður í blaði dagsins.

Hann varð verulega reiður þegar fréttirnar um Gagnamagnið fóru í loftið, þrátt fyrir bólusetningu kom upp smit í hópnum og getur hljómsveitin ekki sungið og trallað á Eurovison. „Djöf­ull fór það í taug­arn­ar á mér þegar ég sá að Eurovisi­on­far­arn­ir hefðu fengið for­gang í bólu­setn­ingu fyr­ir ferðalag sitt til Rotter­dam, rúm­lega tveim­ur og hálf­um mánuði eft­ir að sótt­varna­lækn­ir hafði gefið það út að ekki væri hægt að velja fólk eft­ir mik­il­vægi í bólu­setn­ing­ar.“

Bjarni segir að stjórnvöld hugsi ömurlega um okkar helsta afreksfólk í íþróttum. „Af hverju hugs­um við svona illa um íþrótta­fólkið okk­ar? Á Íslandi eru at­vinnu­leys­is­bæt­ur fyr­ir marga sem hafa eng­an áhuga á því að vinna, bæði er­lenda og ís­lenska rík­is­borg­ara. Þá hef­ur lista­fólk hér á landi verið í áskrift að lista­manna­laun­um ár eft­ir ár. Hvort þetta fólk hef­ur skilað af sér ein­hverri áþreif­an­legri vinnu hef ég ekki hug­mynd um, ég hef alla­vega ekki orðið neitt sér­stak­lega var við það í sum­um til­fell­um.“

Bjarni heldur svo áfram. „Það er allri þjóðinni til heilla ef íþrótta­fólkið okk­ar nær góðum ár­angri úti í hinum stóra heimi og það sýndi sig kannski best á EM 2016 í knatt­spyrnu. Nú er mál að stjórn­mála­menn hér á landi beiti sér af al­vöru fyr­ir því að styrkja íþrótta­fólkið og íþrótta­hreyf­ing­una okk­ar. Fólk á að geta stundað sína íþrótt af kappi, líkt og í lönd­un­um í kring­um okk­ur, án þess að þurfa að lifa á morgun­korni heilu og hálfu vik­urn­ar,“ skrifar Bjarni í Morgunblaðið.