Búast má við því að Kjartan Henry Finnbogason verði þátttakandi í leik KR og Vals í kvöld í efstu deild karla. Kjartan Henry á að losna úr sóttkví í dag eftir heimkomu frá Danmörku.

Kjartan gekk í raðir KR í síðustu viku eftir farsælan feril erlendis. Kjartan fékk samningi sínum rift eftir að ljóst varð að Esbjerg kemst ekki upp í úrvalsdeildinni. Kjartan sem er 34 ára gamall gekk í raðir Esbjerg í upphafi árs en hann ætlaði sér að koma heim um mitt sumar.

Ljóst er að Kjartan mun hið minnsta spila með KR til 37 ára aldurs og mun hann styrkja deildina mikið. Tómas Þór Þórðarson ræddi um heimkomu Kjartans í útvarpsþætti Fótbolta.net um helgina.

„Kjartan Henry Finnbogason, það er engin smá ábyrgð á hans herðum, og ég er ekki bara að tala um í markaskorun,“ sagði Tómas í þættinum og kveðst hann hafa áhyggjur af KR.

„Hann þarf að koma inn og kveikja undir þessu dóti. Það er eitthvað sem hann getur svo sannarlega með almennum töffaraskap, mörkum og frammistöðu. Þetta er gamalt lið en reynsluboltar þurfa stundum einhvern til að ýta aðeins við sér.“

Tómas telur að kannski verði of mikil ábyrgð sett á herðar Kjartans um að rífa KR-inga í gang.

„Mér líður eins og Kjartan Henry þurfi nánast að setja þetta KR lið á bakið. Það er ósanngjarnt því hann hefur ekki spilað í þessari deild í háa herrans tíð en hann kemur inn með svakalega pressu. Eitthvað þarf að gerast svo þetta tímabil KR verði ekki eins og í fyrra. Þeir eru rosalega ósannfærandi,“ sagði Tómas í útvarpsþætti Fótbolta.net.