Keflavík tók á móti Stjörnunni í Pepsi Max-deild karla í kvöld. Nýliðarnir unnu nokkuð óvæntan 2-0 sigur. Þetta var fyrsti leikur Stjörnunnar eftir uppsögn Rúnars Páls Sigmundssonar í vikunni. Þorvaldur Örlygsson stýrir liðinu nú.

Heimamenn byrjuðu leikinn betur og eftir tuttugu mínútur fengu þeir vítaspyrnu. Það var ansi umdeildur dómur þá. Haraldur Björnsson hafði rokið úr marki Stjörnunnar til þess að hreinsa í innkast. Keflvíkingar voru fljótir að taka innkastið og var Haraldur enn að hlaupa til baka þegar Kian Williams fékk boltann inni á teig. Brynjar Gauti Guðjónsson virtist svo stjaka við Williams, sem lenti á Haraldi og brot dæmt.

Frans Elvarsson þurfti að koma boltanum tvisvar í netið úr vítaspyrnunni þar sem sú fyrri var dæmd ógild vegna hreyfingar á boltanum. Seinni spyrnan var þó góð og gild.

Staðan í hálfleik var 1-0.

Snemma í seinni hálfleik tvöfölduðu heimamenn forystu sína. Williams skoraði þá eftir fyrirgjöf frá Ástbirnir Þórðarsyni.

Gestirnir voru ekki líklegir til að minnka muninn í seinni hálfleik. Enda gerðu þeir það ekki. Glæsilegur 2-0 sigur Keflavíkur staðreynd.

Keflvíkingar eru með 3 stig eftir tvær umferðir. Stjarnan er aðeins með 1 stig.