Fyrir sex árum síðan var Edouard Mendy atvinnulaus og þurfti að fara á atvinnuleysisbætur til þess að geta borðað og borgað reikninga.

Mendy lék þá með Cherbourg í neðri deildum í Frakklandi en fékk ekki lengri samning, þá 23 ára var Mendy óviss um það hvort hann fengi annað tækifæri í fótboltanum. Mendy lagði hins vegar mikið á sig og í gær var hann í byrjunarliði Chelsea í undanúrslitum Meistaradeildar Evrópu.

Atvinnulaus Mendy barðist fyrir því að fá reynslu hjá Marseille, hann komst að þar og lék fyrir varalið félagsins. Hann gekk svo í raðir Reims og var þaðan keyptur til Rennes árið 2019, ári síðar borgaði Chelsea nokkra milljarða fyrir kappann.

„Ef einhver hefði sagt mér það fyrir sex árum að ég væri hérna, þá hefði ég aldrei hlustað á þann aðila aftur,“ sagði Mendy.

„Ég efaðist um mig og hvort ég gæti haldið áfram í fótboltanum. Ég þakka þessum augnablikum fyrir staðinn sem ég er á í dag, ég og fjölskylda mín höfum grætt á þessu.“

Mendy segist svo hafa þegið styrki þegar hann var atvinnulaus. „Ég fór á bætur, það var bara til þess að geta æft vel. Ég átti von á mínu fyrsta barni. Það var fótboltinn eða þá að ég hefði þurft að fara í aðra vinnu til að framfleyta okkur og barninu,“ segir Mendy sem í dag þénar 11 milljónir á viku hjá Chelsea.