Forráðamenn Manchester United og Liverpool eru í viðræðum um að leika tvo æfingaleiki í sumar, leikirnir færu fram á Old Trafford og Anfield.

Samkvæmt Mirror eru viðræður í gangi en félögin vonast til þess að fá inn talsvert af fjármunum með þessum leikjum. Félögin hafa verið í sviðsljósinu síðustu daga vegna Ofurdeildarinnar sem var stofnuð en nú hefur verið hætt við þá keppni.

Félögin stefna á leik á Old Trafford í lok júlí og annan leik í byrjun ágúst á Anfield. Félögin fara líklega ekki í æfingaferð út í heim.

COVID-19 faraldurinn kemur í veg fyrir að félögin geti ferðast mikið í sumar en Liverpool hefur nú þegar ákveðið að leika enga leiki á erlendri grundu.

Félögin þurfa því leiðir til að skapa áhugaverða leiki og gætu þessir erkifjendur nú spilað í tvígang, leikirnir gætu verið notaðir til að pufa sóttvarnir á leikvangi áður en enska deildin hefst aftur næsta haust.