Emerson Carioca, fyrrum leikmaður Sampaio Correa í Brasilíu hefur verið dæmdur í 8 leikja bann fyrir fagn sitt er hann tryggði liðinu sigur gegn Marica. Með markinu tryggði Sampaio Correa sér sæti í næstu deild fyrir ofan.
Markið sem Emerson skoraði kom undir lok leiks. Hann fagnaði því með því að fara úr treyjunni og girti niður um sig. Fagnið varð þess valdandi að það kom til átaka milli liðanna á vellinum.
Emerson segist hafa fagnað svona því hann hafi orðið fyrir barðinu á rasískri orðræðu frá leikmönnum og starfsliði Marica þegar hann hefur mætt þeim áður.
„Einstaklingar tengdir Marica hafa verið að kalla mig öllum illum nöfnum síðastliðna þrjá leiki sem ég hef spilað á móti þeim. Ég hef verið kallaður alkóhólisti og feitur api, þess vegna var ég pirraður,“ sagði Emerson um fagn sitt.
Emerson er nú leikmaður Portuguesa Carioca.
