Antonio Cassano fyrrum landsliðsmaður Ítalíu í knattspyrnu ræðir hin ýmsu málefni í nýlegu viðtali við fjölmiðla í heimalandinu. Cassano átti flottan feril sem leikmaður en hann lék meðal annars með Roma, Real Madrid, Inter og AC Milan.
Cassano hefði líklega getað náð miklu lengra en lífsstíll hans utan vallar og heimskupör innan vallar komu honum oft í klípu.
Cassano ræðir um tíma sinn hjá Real Madrid þar sem hann lék frá 2006 til 2008. Hann fékk gefins Nutella súkkulaði í hverjum mánuði og það reyndist honum erfitt.
„Nutella var styrktaraðili félagsins og í hverjum mánuði fékk maður 5 kíló frá þeim;“ sagði Cassano.
„Á sjö mánuðum bætti ég 14 kílóum á mig, ég borðaði bara Nutella upp úr skálinni. Ég skammaðist mín fyrir þetta.“
Cassano segir svo frá því að hann hafi sofið hjá 600 til 700 konum áður en hann náði 25 ára aldri, hann sagðist iðulega hafa spilað vel innan vallar eftir góða lotu á hvíta lakinu.
Cassano lagði skóna á hilluna árið 2017 en hann var þá 35 ára gamall, hann lék tæpa 40 landsleiki fyrir Ítalíu.
