Emma Hayes þjálfari Chelsea í kvennaboltanum leggur til að mörkin fyrir konur verði minnkuð, hún telur að það muni gera knattspyrnu kvenna skemmtilegri.
Hayes er 44 ára gömul og hefur stýrt Chelsea í níu ár, á þeim tíma hefur liðið unnið efstu deild þrisvar. Hayes segir að konur verði að hugsa leikinn út frá líkamlegu atgervi kvenna. Enginn skömm sé í því að breyta hlutum og að ekki þurfi allt að vera eins og hjá körlum.
„Ef ég er með karlmann og konu og læt þau hlaupa 15 metra, í flestum tilfellum þá vinnur karlmaðurinn það spretthlaup,“ sagði Hayes.
„Ef ég nota sömu leikmenn og læt þau hoppa úr kyrrstöðu, þá fer karlmaðurinn hærra en konan. Þetta getum við rætt þegar við tölum um markmenn.“
„Það er oft verið að gagnrýna markmenn í kvennabolta, ég tel að markið sé aðeins of stórt. Ef það væri byggt í kringum líkamlega burði okkar, þá værum við oft að tala um frábæra markverði.“
Hayes leggur til breytingar, það þurfi ekki allt að vera eins í knattspyrnu karla. „Í stað þess að bera allt saman við karlana, þá verðum við að búa til okkar íþrótt í kringum okkar líkama. Viðhorfið þarf að breytast.“
