Aston Villa tók á móti Liverpool í enska bikarnum í gær. Leikurinn endaði með 4-1 sigri Liverpool en Aston Villa þurfti að spila á ungum leikmönnum í leiknum sökum þess að aðalliðshópur félagsins er í einangrun og sóttkví sökum Covid-19 smits í hópnum.
Einn af þeim leikmönnum sem lék sinn fyrsta leik fyrir aðallið Aston Villa í gær var Louie Barry. Fylgst var með honum af eftirvæntingu en Barry er talinn einn af efnilegustu leikmönnum liðsins.
Þrátt fyrir að Aston Villa hafi tapað mun leikurinn seint gleymast hjá Louie Barry en hann skoraði eina mark Aston Villa í leiknum þegar að hann jafnaði leikinn á 41. mínútu.
Eftir leik skiptist Barry á treyjum við miðvörð Liverpool, Fabinho. Einn af þjálfurum Aston Villa var hins vegar fljótur að benda honum á þá staðreynd, að hann myndi kannski vilja eiga treyjuna sem hann spilaði sinn fyrsta leik aðalliðsleik í og skoraði sitt fyrsta mark.
Barry lét ekki segja sér þetta tvisvar og hljóp á eftir Fabinho inn leikmannagöngin og spurði hann vinsamlega hvort hann mætti fá treyjuna sína aftur. Fabinho varð við þeirri beiðni.
This is amazing 😂
Louie Barry swapped shirts with Fabinho, but after a word with a member of Villa staff, chased him down the tunnel to ask for it back!
Now he’s got Fabinho’s shirt, and his debut shirt 🤝#EmiratesFACup pic.twitter.com/6P36O5ciiW
— Football on BT Sport (@btsportfootball) January 8, 2021
Louie Barry er fjölhæfur leikmaður sem getur leyst allar fremstu stöður vallarins. Hann hóf feril sinn með unglingaliði West Bromwich Albion áður en hann samdi við Barcelona í júlí árið 2019.
Forráðamenn Barcelona sögðu á sínum tíma að hann væri „einn af bestu ungu leikmönnum Englands.“ Barry fetaði ótroðnar slóðir með því að semja við Barcelona. Hann er fyrsti Englendingurinn til að æfa og spila í akademíu félagsins, La Masia.
Í janúar árið 2020 var hann keyptur til Aston Villa á rúma eina milljón evra. Hjá Aston Villa hefur hann spilað við góðan orðstír með undir 18 ára liði- og einnig varaliði félagsins.