Nokkrir enskir blaðamenn fengu undanþágu frá reglum um sóttkví hér á landi við komu til landsins. Fengu þeir undanþáguna vegna landsleiks Íslands og Englands í gær. Þar vann England 0-1 sigur á Íslandi.
Oliver Holt blaðamaður hjá Daily Mail og fleiri blaðamenn fengu þessa undanþágu. Aðrir enskir blaðamenn höfðu mætt til landsins um síðustu helgi og farið í fimm daga sóttkví.
„Farþegar sem koma til Íslands frá og með 19. ágúst geta valið á milli þess að fara í tvær sýnatökur vegna COVID-19 með 5 daga sóttkví á milli þar til niðurstaða seinni sýnatöku liggur fyrir, eða sleppa sýnatöku og sitja í 14 daga sóttkví frá komunni til landsins,“ segir í reglum á covid.is.
Þessir blaðamenn fengu leyfi frá yfirvöldum hér á landi að mæta á landsleik Íslands og Englands í gær og umgangast þar nokkurn fjölda en þurfa þess utan að fara efitr reglum um sóttkví.
„Við fengum undanþágu sem blaðamenn til að fara á leikinn, þetta kom upp á síðustu stundu. Við þurftum að fara frá flugvelli á hótelið, þaðan á völlinn og aftur á hótelið. Við höfum ekkert séð fyrir utan völlinn,“ sagði Holt á Twitter.
Hanns sagði Reykjavík fallega borg. „Reykjavík er falleg borg, ég hef aðeins séð hana úr leigubíl. Ég myndi elska að koma hingað aftur.“