Eftir þungan rekstur á síðasta ári er knattspyrnudeild ÍA skuldlaus en þetta kom fram í hlaðvarpsþættinum Dr. Football í dag.

Mikið var fjallað um erfiðan rekstur ÍA á síðasta ári en knattspyrnudeildin tapaði um 62 milljónum. ,,Laun og annar rekstrarkostnaður hækkaði einnig umtalsvert milli ára og samanlögð áhrif þessa eru að félagið skilaði um 61 milljóna króna taprekstri á árinu 2019, í stað 47 milljóna króna hagnaðar á árinu 2018,“ skrifaði Magnús Guðmundsson formaður deildarinnar um þau tíðindi.

Geir Þorsteinsson tók við sem framkvæmdarstjóri knattspyrnudeildar ÍA í vetur og virðist hafa tekið til í rekstri félagsins. „Skaginn skuldar ekki krónu, vont rekstrarár í fyrra. Geir Þorsteinsson hefur komið inn og gert góða hluti,“ sagði Hjörvar Hafliðason í þætti sínum í dag.

Skaginn setti leikmenn sína á hlutabótaleiðina í vetur þegar kórónuveiran fór að gera vart við sig í íslensku samfélagi.

ÍA siglir lygnan sjó í efstu deild karla en Jóhannes Karl Guðjónsson er að halda liðinu í deildinni, annað árið í röð.