Guðmann Þórisson varnarmaður FH skoðar það að yfirgefa félagið en samningur hans við FH er á enda í lok tímabils. Varnarmaðurinn hefur spilað vel í sumar.
„Mér finnst ég búinn að eiga mitt besta season í langan tíma,“ sagði Guðmann við Fótbolta.net í dag.
Varnarmaðurinn er 33 ára gamall en hann er að klára annað tímabil sitt með FH eftir að hann snéri aftur, þetta er í annað sinn sem hann spilar með félaginu. Guðmann hefur spilað í Noregi og Svíþjóð í atvinnumennsku.
„Kannski er best að segja sem minnst en það hefur ekki gengið vel að fá nýjan samning hjá FH þannig að ég þarf að hugsa um sjálfan mig og fara að skoða hvað önnur lið hafa að bjóða.“
Líklegt þykir að nokkur félög muni renna hýru auga til Guðmanns eftir frammistöðu sumarsins en hann hefur spilað 13 leiki í efstu deild í sumar.