Í Keflavík tóku heimakonur á móti Haukum í toppslag í Lengjudeild kvenna. Eftir að Tindastóll tryggði sér sæti í Pepsi max deildinni að ári í gær eru það Keflavík og Haukar sem berjast um seinna lausa sætið. Þessi lið hafa ekki mæst í deildinni í sumar og því mátti búast við hörkuleik.
Eina mark leiksins kom undir lok fyrri hálfleiks. Paula Isabelle Germino Watnick skoraði fyrir Keflavík eftir fyrirgjöf frá Natasha Moraa Anasi. Heimakonur komu sér þar með í þægilega stöðu fyrir lokasprettinn í deildinni.
Eftir leikinn er Keflavík með 36 stig í öðru sæti. Haukar eru í því þriðja með 29 stig. Þrír leikir eru eftir og Keflavík og Haukar munu berjast um lausa sætið í efstu deild. Síðari leikur þessara liða fer fram í loka umferðinni þann 9. október.
Keflavík 1 – 0 Haukar
1-0 Paula Isabelle Germino Watnick (45′)