Reg Harrison, elsti eftirlifandi sigurvegari FA bikarsins, er látinn 97 ára að aldri. Harrison lést á heimili sínu í vikunni en hann hafði búið þar síðast liðin 54 ár. Harrison er goðsögn hjá knattspyrnufélaginu Derby á Englandi og spilaði með liðinu frá árinu 1944 til 1955.
Harrison gekk til liðs við Derby þeegar hann var 16 ára gamall og skoraði 59 mörk í 281 leikjum með félaginu. Það eftirminnilegasta var þó án efa þegar hann vann FA bikarinn með liðinu árið 1946 eftir 4-1 sigur á Charlton í úrslitaleiknum. Hann endaði ferilinn sinn á því að spila með Boston United og Long Eaton United.
Eftir að Harrison setti skóna á hilluna ákvað hann að byrja að þjálfa en hann gerði það þó ekki lengi. Hann fór frekar að einbeita sér að því að efla grasrótarstarf fyrir fótbolta í heimabæ sínum.
