Íslenska karlalandsliðið í fótbolta fellur niður um tvö sæti og situr í 41 sæti á styrkleikalista FIFA sem kom út í dag. Ísland tapaði gegn Englandi og Belgíu í liðnum mánuði.

Staða Íslands á listanum hefur versnað til muna undir stjórn Erik Hamren og hefur liðið ekki verið neðar á lista FIFA síðan 2013 þegar Lars Lagerback og Heimir Hallgrímsson voru að hefja sína vegferð. Liðið var þá í 49 sæti.

Lagerback og Heimir fóru með liðið upp í 21 sæti á styrkleikalista FIFA en í dag er öldin önnur. Þjóðadeildin hefur leikið Hamren og Freyr Alexandersson grátt þar sem liðið hefur ekki unnið leik í sex tilraunum, árangurinn í undankeppni EM var með miklum ágætum og er liðið í umspili um laust sæti á EM.

Ísland fór alveg niður í 112 sæti undir stjórn Ólafs Jóhannessonar árið 2010.

Hér að neðan er staða Ísland á listanum yfir síðustu ár.