Mason Greenwood framherji Manchester United virðist ekki bara hafa hagað sér ósæmilega á Íslandi um liðna helgi, heldur virðist hegðun hans hafa farið úr böndunum á þessu ári eftir að hann varð að stórstjörnu Manchester United.Þannig seir Daily Mail frá því í dag að Greenwood hafi undanfarna mánuði verið að leigja hús á Airbnb til að halda partý. Þennan gleðskap hélt Greenwood þegar útgöngubann var í Bretlandi og fólk mátti ekki hittast, ef marka má frétt Daily Mail.
Greenwood hefur leigt sama húsið í sex skipti en það er í úthverfi Manchester og nágrannar þar eru orðnir þreyttir á gleðskap sem Greenwood fær fólk í.
Manchester United er að rannsaka málið segir Daily Mail en í fréttinni segir að Greenwood hafi síðast haldið partý 28 ágúst, nokkrum dögum áður en hann kom til Íslands og braut sóttvarnarreglur með liðsfélaga sínum Phil Foden.
Sean McKay sem býr nálægt húsinu sem Greenwood leigir segir að í minnsta kosti sex skipti hafi Greenwood leigt húsið á Airbnb og haldið alvöru partý. „Greenwood hefur haldið þessi svakalegu partý hérna síðustu mánuði. Það kemur fjöldi fólks saman en 13 geta sofið í húsinu. Lætin eru óbærileg, ég hef bankað upp á nokkrum sinnum og beðið þau að róa sig,“ sagði McKay.
„Tónlistin er í gangi fram eftir morgni, þetta heldur mér vakandi. Húsið hristist.“
,,Eitt kvöldið voru drengir mættir þarna fyrir utan og sögðu Mason Greenwood að hann gæti ekkert í fótbolta, þeir vildu komast inn og brjóta á honum lappirnar. Ég vinn dagvinnu og þetta hefur verið hryllingur.“
McKay var ekki hissa að Greenwood væri einn af þeim sem hefði brotið sóttvarnareglur í Reykjavík með því að hitta íslenska konur. „Þegar ég heyrði af þessum heimskupörum á Íslandi, þá vissi ég að annar þeirra væri hann.“