Rúrik var gestur í útvarpsþættinum Brennslan á FM957 en þar hringdi hann símaat í athafnamanninn Jóhannes Ásbjörnsson en Jóhannes er mágur Rúriks. Jóhannes, sem einnig er þekktur sem Jói, þekkir Rúrik vel en hann hefur verið í sambandi með systur Rúriks síðan Rúrik var 11 ára.
Í símaatinu átti Rúrik að hringja í Jóa og segja honum að hann ætti engan pening lengur. „Ég veit ekki hvort þú heyrir það á röddinni á mér en ég er ekki beint með frábærar fréttir. Þú ert svona minn maður þegar ég þarf að ræða hlutina,“ sagði Rúrik við Jóa og bætti síðan við að það væri hart í árinni hjá honum. Rúrik sagði að fyrirtækin sem hann er búinn að vera að vinna í væru ekki að ganga upp.
„Málið er að það er búið að vera COVID og svona og ég er basically buinn að vera all in í þessu, ég setti eiginlega bara allt mitt í þetta,“ sagði Rúrik og Jói skildi ekki alveg hvað hann átti við. „Ég er bacically á kúpunni, eiginlega bara í mínus. Ég er pínu fucked ef ég á að segja alveg eins og er.“
„Hvað meinarðu, þú varst að koma heim fyrir nokkrum mánuðum, varst að klára þennan samning. Hvernig geturðu verið í mínus?“ spurði Jói þá og Rúrik sagði við hann að það væri tækifæri í þessu. „Það er gæji sem er að leita sér að félaga og þetta er í mínum huga geggjaður díll. Frændi félaga míns er með bílasölu og hann er mjög þreyttur á að reka hana. Hann vill 10 milljónir og vill að ég komi inn í þetta. Þetta er solid gæji sko og ég sé fyrir mér að þú myndir lána mér 10 kúlur og ég fer þangað inn. Ég myndi borga þér til baka eitthvað, allavega 10. Verðum við ekki allavega að skoða þetta?“
Þegar þangað var komið náðu hvorki Rúrik né þáttastjórnendur Brennslunar að halda andliti. Þeir fóru að skellihlægja og sögðu Jóa að um símaat væri að ræða „Ég hugsaði bara, hann er kominn með þessi geðhvörf sem fótboltamenn fá þegar þeir eru að klára ferilinn,“ sagði Jói þegar hann komst að því að þetta væri allt í plati.