Hér fyrir neðan má sjá úrslit kvöldsins:
Breiðablik 7-0 Þór/KA
Breiðablik var á toppi deildarinnar fyrir leikinn en liðið hefur ekki tapað einum leik í sumar og það ætlaði svo sannarlega ekki að byrja á því í dag. Kristín Dís Árnadóttir kom Blikum yfir snemma í leiknum og skömmu síðar skoraði Áslaug Munda Gunnlaugsdóttir annað mark þeirra. Áslaug var síðan aftur á ferðinni í lok fyrri hálfleiks þegar hún kom Breiðablik í 3-0.
Snemma í seinni hálfleik skoraði Agla María Albertsdóttir fjórða mark Blika og einungis þremur mínútum síðar skoraði Berglind Björg Þorvaldsdóttir fimmta markið. Á 74. mínútu skoraði Sveindís Jane Jónsdóttir sjötta mark Breiðabliks og örfáum mínútum síðar skoraði Rakel Hönnudóttir sjöunda markið.
Lokaniðurstaðan því 7-0 fyrir Blikum sem sitja efstar í deildinni. Þær eru enn taplausar en það sem er ennþá merkilegra er að þær hafa ekki fengið stakt mark á sig í deildinni á þessu tímabili.
Fylkir 1-1 ÍBV
Olga Sevcova kom ÍBV yfir snemma í leiknum. Þær héldu forystunni fram í seinni hálfleik en þegar um klukkutími var liðinn af leiknum náði Þórdís Elva Ágústsdóttir að jafna metin fyrir Fylki. Fleiri urðu mörkin ekki og var lokaniðurstaðan því 1-1.
