Greint er frá því í massavís á fjölmiðlum á meginlandinu að þeir Quique Setien og Eric Abidal, þjálfari og formaður knattspyrnudeildar Barcelona, verði reknir í kjölfar taps liðsins gegn Bayern Munchen í kvöld.

Leikurinn sem um ræðir var í  8-liða úrslitum Meistaradeildarinnar í kvöld. Það má segja að Meistaradeildin hafi verið síðasti möguleiki Barcelona til að bjarga lélegu tímabili en Bayern kom heldur betur í veg fyrir það í kvöld.

Þegar einungis 4 mínútur voru liðnar af leiknum náði Bayern að komast yfir eftir mark frá Thomas Müller. Örfáum mínútum seinna skoraði David Alaba, varnarmaður Bayern, sjálfsmark og jafnaði um leið leikinn. Bayern ætlaði þó ekki að láta sjálfsmark skipta máli og gerði liðið sér lítið fyrir og skoraði þrjú önnur mörk áður en blásið var til hálfleiks.

Á 57. mínútu náði Luis Suarez að minnka muninn fyrir Barcelona en því miður fyrir spænska liðið þá átti þetta eftir að vera síðasta mark liðsins í kvöld. Bayern var hins vegar langt frá því að hætta að skora. Joshua Kimmich kom liðinu aftur í þriggja marka forystu og Robert Lewandowski jók forystuna enn meira með marki á 82. mínútu.

Phillipe Coutinho, sem hefur ekki alveg náð fótfestu í Bayern liðinu síðan hann fór þangað frá Barcelona, gerði sér lítið fyrir og skoraði tvö mörk á 5 mínútum. Til gamans má geta að hann átti einnig stoðsendinguna í marki Lewandowski.

Barcelona hefur ekki náð að vinna neina titla á leiktíðinni og gengi liðsins undanfarin ár hefur ekki verið upp á sitt besta. Líklegt þykir að fyrrum leikmaður Barcelona, Xavi, gæti tekið við liðinu en hann hefur stýrt liðinu Al Sadd í Katar.