Um miðjan júlí tilkynnti KA að félagið hafi gert samkomulag um starfslok við Óla en hann segir það ekki hafa verið staðan. „Ég var bara rekinn, það var þannig,“ sagði Óli í viðtalinu en Fótbolti.net vakti athygli á því.
Óli segist vera með fullt af punktum sem hann hafi klikkað sjálfur á. „Ég er pirraður út í sjálfan mig að hafa látið af innsæi mínu sem hefur komið mér ákveðið langt,“ sagði Óli. Mér finnst leiðtoginn í sjálfum mér hafa brugðist í vetur með ákvarðanatökur sem mér leið ekki vel með. Ég lét selja mér hluti sem ég var innst inni ekki ánægður með.“
Þegar allt lék í lyndi var Óli duglegur að fylgjast með því sem fjölmiðlar og sérfræðingar höfðu um hann að segja. Það varð þó erfitt þegar hlutirnir gengu ekki jafn vel. „Þetta er erfitt þegar hávær orð eru sögð og miklir dómar og sleggjur. Það er bara hluti af starfinu en það breytir því ekki, og ég ætla bara að tala út, að við erum með tilfinningar. Ég er bara þannig gæi að ég er mjög opinn á mínar tilfinningar. Ég er ekkert feiminn við að segja að þetta býr til pressu og kvíða sem þyrlast upp inni í manni. Þetta býr til svefnlausar nætur.“
Vegna þessa ákvað Óli að hætta að fylgjast með þessum umræðum. „Ég tók þá ákvörðun í fyrra að slökkva á þessu af því að ég get stýrt þessu þannig að ég les ekki miðlana. Ég hef ekki horft á eitthvað sem heitir Pepsi mörk, hlustað á podcöst eða lesið miðlana ef það er eitthvað sem snýr að deildinni eða mér. Það er ákveðið frelsi í því.“