KR 2-0 Fjölnir
Liðin mættu fyrr í júlí og skildu þá jöfn. Hvorugt liðanna náði að skora í fyrri hálfleik en Óskar Örn Hauksson braut ísinn og kom KR-ingum yfir á 54. mínútu. Kristján Flóki Finnbogason jók síðan forystuna fyrir KR stuttu síðar. Fleiri mörk voru ekki skoruð og komst KR því áfram í 8-liða úrslit.
Breiðablik 3-0 Grótta
Óskar Hrafn Þorvaldsson, þjálfari Breiðabliks, stýrði liði sínu í kvöld gegn fyrrum liði sínu, Gróttu. Breiðablik náði að komast yfir rétt fyrir hálfleik en það var Kwame Quee sem skoraði mark Blika. Á 66. mínútu skoraði Gísli Eyjólfsson fyrir Blika og kom þeim í 2-0. Stuttu fyrir leikslok náði hinn umdeildi Brynjólfur Andersen að gulltryggja sigur Blika með marki eftir stoðsendingu frá Kwamee Quee. Lokaniðurstaðan 3-0 fyrir Blikum sem sigla inn í 8-liða úrslitin.
HK 6-2 Afturelding
Afturelding komst yfir snemma í leiknum með marki frá Andra Frey Jónassyni. HK-menn voru þó ekki lengi að svara fyrir sig og settu þeir Guðmundur Þór Júlíusson og Atli Arnarsson tvö mörk í net Aftureldingar á skömmum tíma. Rétt fyrir hálfleik náði Stefán Alexander Ljubicic að koma HK í 3-1.
Í seinni hálfleik náði Alexander Aron Davorsson að minnka muninn fyrir Aftureldingarmenn en það dugði skammt. Á síðastu 15 mínútum leiksins náðu þeir Guðmundur Þór, Ívar Örn og Ari Sigurpálsson allir að skora eitt mark hver og endaði leikurinn með stórsigri HK, 6-2. HK er því einnig komið áfram í 8-liða úrslitin.
