Sagt er að Chelsea sé tilbúið að bjóða Henderson 170 þúsund pund á viku í laun ef hann krotar undir hjá þeim. Það eru um 30 milljónir króna á viku og um 128 milljónir króna á mánuði. Staðan er hins vegar erfið þar sem að Henderson er samningsbundinn Manchester United. Þar hefur hann ekki fengið að spila þar sem David de Gea hefur verið aðalmarkvörður Manchester United. De Gea hefur reyndar ekki staðið sig frábærlega undanfarið og hafa margir velt því fyrir sér hvort hann gæti misst sætið sitt til Henderson.
Frank Lampard, stjóri Chelsea, vill ólmur fá Henderson til liðs við sig en frammistaða núverandi aðalmarkmanns Chelsea, Kepa Arrizabalaga, hefur ekki verið upp á marga fiska á leiktíðinni. Kepa var keyptur fyrir um 72 milljónir punda og er því dýrasti markmaður sögunnar. Lampard virðist þó vera kominn með nóg þar sem hann vill fá Henderson til sín frekar. Þá er Tottenham einnig sagt hafa áhuga á markmanninum.
Heimildarmenn hið ytra segja að Henderson vilji spila nóg af leikjum og ef hann fær það ekki hjá Manchester United þá mun hann að öllum líkindum leita annað.
Enski boltinn á 433 er í boði 
