Hér fyrir neðan má sjá úrslit kvöldsins:
Fylkir 3-2 HK
Djair Terraii Carl Parfitt-Williams skoraði fyrsta mark leiksins á 16. mínútu og kom Fylki yfir. Valgeir Valgeirsson gerði sér þá lítið fyrir og jafnaði átta mínútum síðar og kom síðan HK yfir með öðru marki, sjö mínútum síðar.
Í seinni hálfleik náði Arnór Gauti Ragnarsson að jafna fyrir Fylkismenn. Sjö mínútum síðar fékk Fylkir víti eftir að Ásgeir Börkur Ásgeirsson braut á Parfitt-Williams. Valdimar Þór Ingimundarson fór á punktinn og kom Fylki yfir. Reyndist þetta vera sigurmark leiksins og Fylkir fékk því þrjá góða punkta úr leiknum.
FH 2-1 Grótta
Eftir einungis átta mínútur kom Þórir Jóhann Helgason heimamönnum yfir og hélst staðan 1-0 fram í hálfleik. Í seinni hálfleik skoraði Daði Freyr Arnarsson, leikmaður FH, sjálfsmark og jafnaði þar af leiðandi leikinn. Sjálfsmarkið gerði þó ekki mikið því mínútu seinna náði Steven Lennon að koma FH aftur yfir. Fleiri mörk voru ekki skoruð og endaði leikurinn því 2-1 fyrir FH. Eiður Smári Guðjohnsen og Logi Ólafsson, sem tóku við FH liðinu fyrr í júlí, hafa því enn ekki tapað leik síðan þeir tóku við.
Fjölnir 1-3 Valur
Sjö mínútum eftir að flautað var til leiks náði Lasse Petry Andersen að koma Völsurum yfir. Áður en blásið var til hálfleiks skoraði síðan Peter Zachan, leikmaður Fjölnis, sjálfsmark og kom Val því í tveggja marka forystu.
Í seinni hálfleik náði Jóhann Gunnarsson að minnka muninn fyrir Fjölni en það dugði skammt því Fjölnir náði ekki að skora fleiri mörk í leiknum. Sigurður Egill Lárusson, leikmaður Vals, náði hins vegar að skora þriðja mark Vals í leiknum og tryggði þeim sigurinn um leið. Valur fékk þrjá punkta úr leiknum og náði að skríða í efsta sæti töflunnar. KR fylgir þó fast á eftir þeim með leik til góða, sem og Stjarnan sem á þrjá leiki til góða.
Stjarnan 1-1 Víkingur
Stjarnan hefur byrjað tímabilið vel þrátt fyrir að hafa þurft að fara í sótthví. Í dag tóku þeir á móti Víking á heimavellinum í Garðabænum. Hilmar Árni Halldórsson kom Stjörnunni yfir eftir 14. mínútur eftir stoðsendingu frá Alexi Þór. Rétt fyrir hálfleik fékk Víkingur víti eftir að brotið var á Nikolaj Andreas Hansen. Óttar Magnús Karlsson tók vítið fyrir Víkinga og skoraði úr því. Fleiri urðu mörkin ekki og endaði því leikurinn með 1-1 jafntefli.
