Rabbi Matondo, leikmaður Schalke, þurfti að biðjast afsökunar á samskiptamiðlum í gær.
Matondo er 19 ára gamall vængmaður Schalke en hann var myndaður í ræktinni í treyju Borussia Dortmund.
Það er mikill rígur á milli Dortmund og Schalke og voru stuðningsmenn þess síðarnefnda langt frá því að vera kátir.
,,Ég er mjög vonsvikinn út í sjálfan mig fyrir að bregðast öllum þeim sem koma að Schalke,“ sagði Matondo á meðal annars.
,,Ég vil biðja alla í félaginu afsökunar, sérstaklega okkar mögnuðu stuðningsmenn sem ég særði. Það var ekki ætlunin.“
,,Þetta var barnalegt af mér og ég klæddist treyjunni á einkaæfingu. Hún var í eigu góðvinar míns Jadon Sancho.“
Sancho er vinur Matondo en hann leikur einmitt með Dortmund.