Sjötta umferð í efstu deild kvenna í knattspyrnu hefst í kvöld. Fyrsti leikurinn hefst klukkan 17:30 í Vestmannaeyjum þegar ÍBV tekur á móti Breiðablik. Klukkan 18:00 hefst leikur Þórs/KA gegn FH á Akureyri. Tveir leikir hefjast klukkan 19:15. Stjarnan tekur á móti KR á Samsungvellinum í Garðabæ og Þróttur tekur á móti Selfoss á Eimskipsvellinum í Laugardal. Á morgun er einn leikur á dagskrá. Valur tekur á móti Fylki á Origovellinum klukkan 19:15. Leikur Vals og Fylkis verður í beinni útsendingu á Stöð 2 sport.
Stjarnan er í sjötta sæti með sex stig eftir fimm leiki og KR er á botninum án stiga eftir þrjá leiki. Kristján Guðmundsson þjálfari Stjörnunnar segir hópinn vel stemmdan fyrir leik kvöldsins. „Þetta verður spennandi að því leyti að við þurfum að rétta okkur við eftir erfiða þrjá leiki á móti toppliðum.“
Munurinn á þremur efstu liðunum og þeim sem á eftir koma er mikill að sögn Kristjáns. „Okkar úrslit eru í takt við úrslit annarra liða á móti þessum sterkustu liðum. Kaldur sannleikur er sá að við erum ekki nær þeim en þetta. Maður er svona að vona að ungir og ferskir fætur geti hlaupið meira eða haldið boltanum betur á móti eldri leikmönnum en það virðist ekki vera. Þegar munurinn er svona mikill sjást mistökin sem við erum að gera og veikleikarnir.“
Kristján býst við jöfnum leik í kvöld á móti KR. „Tölfræðin segir okkur það að þetta eru jafningjaleikir. Leikurinn skiptir gríðarlegu máli upp á stigasöfnun í neðri hlutanum.“
KR skoraði fjögur mörk í síðasta leik sem var bikarleikur. Kristján býst við að það hafi gefið þeim byr undir báða vængi. „Þær snéru leiknum við og áttu góðan seinni hálfleik á móti Tindastól. Það hlýtur að hafa komið þeim í gang.“
Anna María Baldursdóttir fyrirliði Stjörnunnar hefur ekkert spilað með liðinu í sumar. Kristján getur ekki sagt til um það hvenær hún snýr aftur á völlinn. „Hún spilaði heilan leik fyrir Covid og meiðist svo í heimaæfingum og er ekkert á leiðinni inn á völlinn eins og staðan er núna. Hún er með eitthvað þrálátt í hnénu.“
Þriðjudagurinn 14. júlí
ÍBV – Breiðablik kl. 17:30
Þór/KA – FH kl. 18:00
Stjarnan – KR kl. 19:15
Þróttur R. – Selfoss kl. 19:15
Miðvikudagurinn 15. Júlí
Valur – Fylkir kl. 19:15
