Enska úrvalsdeildin samþykkti í gær að félög þar í landi geti hafið æfingar í dag í litlum hópum. Fimm leikmenn geta komið saman og æft næstu daga og vikur.
Ekkert félag hefur æft í tæpa tvo mánuði vegna kórónuveirunnar en stefnt er að því að hefja leik 12 eða 19 júní.
Troy Deeney, fyrirliði Watford hefur gefið það út að hann neiti að mæta til æfinga. Hann er hræddur við kórónuveiruna og að koma með hana heim til sín.
„Við eigum að byrja í vikunni en ég hef látið vitað að ég mæti ekki,“ sagði Deeney sem er þekktur harðhaus í boltanum.
„Það þarf bara einn að smitast, ég vil ekki koma með það heim til mín. Sonur minn er fimm ára gamall og er með öndunarerfiðleika. Ég vil ekki skapa meiri hættu fyrir hann, þú átt að keyra heim í skítugum fötum. Ef ég á að þvo fötin með hans og konu minnar, þá er hættan meiri.“
Fjölskylda Deeney er fámenn og hann er hræddur. „Ég hef misst pabba, ömmu og afa. Það eru þau sem mér þykir vænt um. Það er mikilvægara að eiga ástvini en að græða peninga,“ sagði Deeney sem fær líklega ekki laun þegar hann neitar að mæta til vinnu.