Víðir Reynisson, yfirlögregluþjón hefur vakið mikla athygli í starfi sínu síðustu vikur. Víðir hefur verið í framlínunni þegar kemur að ákvörðun er varðar kórónuveiruna. Hann situr daglega fréttamannafundi og fer yfir stöðu mála með þjóðinni.
Víðir er í starfi hjá KSÍ, þar er hann öryggisstjóri. Hann fékk tímabundið leyfi frá starfinu til aðstoða ríkislögreglustjóra á dögunum. Víðir hefur farið á þrjú stórmót með íslenska landsliðinu, tvö með karlalandsliðinu og eitt með kvennalandsliðinu. Hann segist hafa lært mikið af því að starfa í kringum fótboltann.
Hann ræddi við Sigmund Erni á Hringbraut í gær og fór yfir atvik frá árinu 2016, þá var hann með íslenska landsliðinu á Evrópumótinu í Frakklandi. Liðið vann þar frækinn sigur á Englandi og komst í átta liða úrslit. ,,Þetta var þvílík tilfinning, það má bara vera ákveðinn fjöldi starfsmanna á bekknum. Svo erum við nokkrir fyrir aftan bekkinn, svo skora Englendingar og við trúum þessu ekki. Svo kemur innkast og mark og við missum okkur alveg,“ sagði Víðir við Sigmund Erni á Hringbraut.
Víðir sat fyrir aftan varmannabekkinn og segir frá því hvernig hann og samstarfsmenn hans fögnuðu. ,,Við erum í jakkafötum, við vorum með enska stuðningsmenn fyrir aftan okkur. Við misstum okkur alveg, hoppuðum upp á handriðið. Svo þegar seinna markið kemur, þá vorum við ennþá glaðari.“
Víðir missti sig í gleðinni og gleymd um stund sínu hlutverki, sem öryggisstjóri. ,,Rétt fyrir leikslok forum við niður á völlinn, allir með verkefni. Svo er flautað af, svo man maður bara eftir sér í fanginu á Heimi og á háhest á Sigga Dúllu. Algjörlega búinn að missa tökin á því sem maður á að vera að gera.“
Það var síðan fyrirliði liðsins sem kom Víði aftur niður á jörðina, sjálfur Aron Einar Gunnarsson
,,Gleðin var ólýsanleg, allur þessi dagur. Við sátum inni í klefa eftir fagnaðarlætin, ég hef oft nefnt fólk sem maður lærir af. Heimir Hallgrímsson hefur kennt mér margt en það er annar þarna, Aron Einar Gunnarsson. Þegar við vorum búnir að þessu, þá faðmar hann mann og tekur í jakkann og segir ´Það er bara næsti leikur, næsti leikur´. Þá er maður kominn aftur í gírinn.“
