Framkvæmdastjórar allra 55 knattspyrnusambandanna í Evrópu sátu í dag, þriðjudag, fjarfund með fulltrúum UEFA þar sem farið var yfir stöðu mála varðandi keppni landsliða og félagsliða á komandi mánuðum.

Kynnt var samantekt frá starfshópum UEFA um málið og ýmsir möguleikar ræddir. Þá var farið yfir stöðu ýmissa verkefna eins og t.d. Hat Trick styrkjakerfi UEFA fyrir aðildarlöndin, þar sem fram kom að UEFA hefði ekki í hyggju að gera neinar breytingar á fyrirhuguðum greiðslum.

Eitt af því sem kom fram á fundinum er að EM kvenna verður fært frá 2021 til 2022.

EM hjá körlunum var fært frá 2020 til 2021 vegna kórónuveirunnar og nú hefur verið ákveðið að fresta EM kvenna. Mótið fer fram á Englandi 2022 og hefst snemma í júlí.