„Við erum reyndar með einstaklingsæfingar. Leikmenn fá að bóka völlinn en það er bara einn leikmaður með völlinn í einu. Stundum er þjálfari með leikmanni en þeir koma frá ellefu á morgnana til sjö á kvöldin,“ sagði Heimir Hallgrímsson, þjálfari Al-Arabi í Bítinu á Bylgjunni í gær.

Samkomubann er í Katar vegna kórónuveirunnar en leikmenn liðsins koma þó á æfingar en aðeins einn í einu.

Félög á Íslandi hafa verið að nota velli sína og boða leikmenn til æfinga, þá einn í einu þar sem leikmaður getur hlaupið og gert æfingar. Það er hins vegar bannað.

Í Fréttablaðinu í dag kemur fram að það sé með öllu bannað að gera slíkt á Íslandi. Þetta er brot á æfingabanni sem ÍSÍ og UMFÍ settu og KSÍ ítrekaði þau tilmæli í gær.