Guðjón Þórðarson efast um að hann fái starf aftur í íslenskum fótbolta, hann segir að aldursfordómar spili þar stórt hlutverk. Guðjón ræddi málið við Ríkharð Óskar Guðnason á Stöð2 Sport í kvöld.
Guðjón starfaði síðast á Íslandi árið 2012, þá var hann þjálfari Grindavíkur. Hann fékk starf í Færeyjum á síðasta ári og gerði vel með NSÍ Runavík. Guðjón er einn sigursælasti þjálfari í sögu Íslands og átti farsælan feril, hann veit hins vegar ekki hvort honum muni standa annað starf til boð.
,,Ég hef áhuga á fótbolta, fótbolti verður alltaf stóru þáttur í mínu lífi. Það gekk vel í Færeyjum, ég hef gaman af fótbolta. Ég mun hafa gaman af fótbolta þangað til ég dett niður dauður,“ sagði Guðjón á Stöð2 Sport í kvöld en hann gerði vel með ÍA, KR, íslenska landsliðið, Stoke og fleiri lið.
Guðjón sem er 64 ára gamall segir stjórnarmenn á Íslandi hafa aldursfordóma. ,,Þegar þú ert kominn yfir sextugt þá eru bara ungir menn í stjórnum félaga frá 30 til 40 ára. Þeir horfa á þá sem eru yfir sextugt sem gamla karla. Reynsla er vanmetinn.“
Guðjón ætlar ekki að sækjast eftir starfi á Íslandi og efast um að tilboð komi . ,,Ég myndi ekki sækja um starf, ég efast um að það verði á Íslandi. Maður veit aldrei, eina sem maður veit er að maður veit ekki neitt.“