Víðir Reynisson, yfirlögregluþjón hefur vakið mikla athygli í starfi sínu síðustu vikur. Víðir hefur verið í framlínunni þegar kemur að ákvörðun er varðar kórónuveiruna. Hann situr daglega fréttamannafundi og fer yfir stöðu mála með þjóðinni.
Víðir er í starfi hjá KSÍ, þar er hann öryggisstjóri. Hann fékk tímabundið leyfi frá starfinu til aðstoða ríkislögreglustjóra á dögunum.
Víðir hefur farið á þrjú stórmót með íslenska landsliðinu, tvö með karlalandsliðinu og eitt með kvennalandsliðinu. Hann segist hafa lært mikið af því að starfa í kringum fótboltann.
,,Í þessu verkefni núna, þá hefur maður lært af þessum þjálfurum. Heimi og Lars, svo Erik og Freyr núna. Maður skilur orðið „team“ miklu betur en maður gerði áður, Heimir Hallgrímsson kenndi mér margt þar,“ sagði Víðir í Bítinu á Bylgjunni í dag og átti þar við hvað liðsheildin í almannavörnum, skiptir miklu máli.
Hann segir Heimi hafa verið snilling í því að setja saman rétta teymið til að fá það besta úr öllum.
,,Hvernig maður fær fólk með sér og hvernig teymið þarf að vera til, í fótboltanum skiptir ekki bara máli með þessa ellefu á vellinum. Varamenn skipta máli, starfsfólkið, stuðningsmennirnir og allt fólkið. Ég hef tileinkað mér það núna.“