,,Það vakti athygli mína í Lengjubikarnum um helgina að Ólafur Kristjánsson var ekki að stjórna FH liðinu. Maður var að renna yfir skýrslu, vinna heimavinnuna. Ég óttaðist það versta, að hann væri í sóttkví,“ sagði Hjörvar Hafliðason, í þætti sínum Dr Football í dag.
Ólafur stýrði FH ekki í sigri á Grindavík um helgina en ef marka má hlaðvarpsþáttinn vinsæla, var hann staddur á Flórída í golfi.
,,Ég hringdi nokkur símtöl og hann er bara í golfi. Maður veit hversu „pro“ Óli er og ég hélt að þetta væri algjort „no, no“ í hans bókum.“
Kristján Óli Sigurðsson, sérfræðingur þáttarins sagði að Ólafur hefði verið eftir á Flórída en þar var FH í æfingaferð á dögunum.
,,Hann er í golfi og það eru sex vikur í mót, allir sultuslakir. Framlengja æfingaferð til að vera í golfi, hann missir af leik. Ef FH geri jafntefli og tapi i fyrstu tveimur leikjunum, þá verður smjattað á þessu í öllum kaffistofum Hafnarfjarðar og víðar.“