Patrick Cutrone, leikmaður Fiorentina, hefur skotið fast á stjóra Wolves, Nuno Espirito Santo.
Cutrone var keyptur til Wolves á 16 milljónir punda í sumar en fékk ekki mörg tækifæri í ensku deildinni.
Cutrone samdi svo við Fiorentina í janúar en hann kennir Nuno um það sem fór úrskeiðis á Englandi.
,,Þú kemst ekkert á ef og hefði. Ef þetta fór svona þá átti þetta að fara svona. Ég veit ekki hvað hefði getað gerst,“ sagði Cutrone.
,,Upplifunin hjá Wolves hjálpaði mér að þroskast sem manneskja og atvinnumaður. Ég kynntist nýrri menningu, nýjum hefðum og bætti enskuna verulega.“
,,Sannleikurinn er sá að stjórinn, Nuno Espirito Santo, var með leikmenn sem hann setti allt traustið á og vildi ekki sleppa. Leikmennina sem hjálpuðu þeim að komast upp.“
,,Hann var mjög hliðhollur því byrjunarliði, alltaf sama byrjunarliðið, ég sá ekki aðra leikmenn í hópnum.“
,,Þetta var ekki bara ég heldur allir þeir sem tilheyrðu ekki þeim hóp.“