Gunnleifur Gunnleifsson einn fremsti markvörður í sögu Íslands hefur lagt hanska sína á hilluna, 45 ára gamall. Gunnleifur hefur átt magnaðan feril hér á landi auk þess að vera hluti af íslenska landsliðinu um nokkurt skeið.
Gunnleifur varð Íslandsmeistari með FH en lék síðustu ár ferilsins með Breiðabliki. Nú þegar hanskarnir fara á hilluna fer Gunnleifur að þjálfa yngri flokka félagsins.
Í viðtali við Morgunblaðið fer Gunnleifur yfir mestu vonbrigðin á ferli sínum, hann segir þau hafa komið vorið 2016 þegar Lars Lagerback og Heimir Hallgrímsson völdu hóp 23 manna sem fór á Evrópumótið í Frakklandi. Gunnleifur hafði verið í hópnum í undankeppninni en missti af sæti til Frakklands.
„Vonbrigðin við að fara ekki á EM voru gríðarleg á sínum tíma. Það var eins og að missa náinn ættingja. Ég lá andvaka yfir þessu á nóttunni og auðvitað var það erfitt,“ segir Gunnleifur við Morgunblaðið.
Gunnleifur hefur lengi hugsað um málið og segir. „Ég trúi því hins vegar núna að það hafi átt að gerast og það er bara fínt. Það var margt erfitt í þessu, það var erfitt að tapa úrslitaleikjum, erfitt að fara frá liðum þar sem manni leið vel og erfitt að gera mistök í leikjum. Það var fullt af erfiðum augnablikum, en ef ég þyrfti að nefna eitt atriði var það að missa af EM mestu vonbrigðin.“