Wayne Rooney fyrrum fyrirliði Manchester United er í skemmtilegu hlaðvarps viðtali við heimasíðu félagsins um feril sinn hjá félaginu.
Rooney er markahæsti leikmaður í sögu Manchester United og Englands en hann er í dag spilandi þjálfari hjá Derby.
Margar skemmtilegar sögur eru í hlaðvarpinu en ein af þeim er þegar ungstirni félagsins ákvað að taka símann hans Rooney úr hleðslu.
„Ég man eftir því að hafa stútað símanum hans einu sinni,“ sagði Rooney í hlaðvarpinu og átti þar við símann hjá Ravel Morrison.
Ravel er einn efnilegasti leikmaður sem þjálfarar hjá United hafa haft en vandræði hans utan vallar urðu til þess að ferill hans náði aldrei flugi.
„Hann kom inn í klefann hjá aðalliðinu þegar hann var í varaliðinu, síminn minn var í hleðslu og hann tók hann úr sambandi og setti sinn í.“
„Þetta var þegar allir áttu BlackBerry síma og netfang þitt var á skjánum. Ég hélt að þetta væri leikmaður úr aðalliðinu, þegar ég sá að þetta var gutti úr varaliðinu þá stútaði ég bara símanum.“
Rooney segir að Ravel hafi haft alla heimsins hæfileika. „Það hefur auðvitað mikið verið rætt um Ravel, hann var magnaður á æfingum en það voru vandræði utan vallar sem höfðu áhrif á feril hans.“
Enski boltinn á 433 er í boði 
