Leikmannasamtökin á Englandi setja á laggirnar starfshóp til að skoða nánar höfuðmeiðsli í fótbolta. BBC segir frá.
Starfshópurinn var myndaður í kjölfar andláts Nobby Stiles og greiningar á heilabilun hjá Sir Bobby Charlton.
Steve Bruce, stjóri Newcastle, segir að verulegar áhyggjur séu um mögulegt samband á milli þess að skalla boltann og að fá heilabilun. „Ef það er samband þarna á milli þurfum við að komast að því fljótt og finna lausn.“
David Moyes, stjóri West Ham, vill að leikmenn af hans kynslóð fari reglulega í skoðun. „Ég hef áhyggjur vegna þess að ég vil að allt verði í lagi í framtíðinni. Ef hægt væri að vera undir eftiliti væri það mjög mikilvægt. Allir myndu líta á það sem góða leið til að horfa fram á við,“ segir Moyes.
Slaven Bilic, stjóri West Brom, segir að banna ætti að skalla boltann á æfingum ef tenging finnst á milli þess að skalla og greinast með heilabilun. „Ef það verður fundið út að skalla boltann tíu sinnum á æfingu geti valdið heilabilun þá skulum við hætta því. Að verið sé að tala um þetta er jákvætt að mínu mati,“ segir Bilic.
Samkvæmt rannsókn frá 2019 kom í ljós að fyrrverandi atvinnumenn í knattspyrnu væru 3,5 sinnum líklegri en hinn venjulegi maður til að látast úr heilabilun.
Á Englandi, Skotlandi og Norður Írlandi er börnum 11 ára og yngri óheimilt að skalla boltann. Sambærilegar reglur hafa verið í gildi í Bandaríkjunum frá 2015.