Hannes Þór Halldórsson var gráti næst þegar hann ræddi um framtíð sína með landsliðinu eftir 0-4 tap gegn Englandi í gær. Hann veit ekki hvort hann hafi spilað sinn síðasta landsleik. Hannes hefur staðið vaktina í markinu í gegnum bestu ár í knattspyrnusögu Ísland. „Ég veit það ekki,“ sagði Hannes við Henry Birgi Gunnarsson á Stöð2 Sport í gær þegar hann var spurður um hvort þetta hafi verið hans síðasti landsleik.
„Það verður að koma í ljós. Ef það fer svo, þá var þetta góður tímapunktur. Að jafna Birki Kristinsson vin minn í leikjafjölda,“ sagði Hannes við Stöð2Sport sem lék sinn 74 landsleik í gær og jafnaði met Birkis Kristinssonar yfir fjölda landsleikja fyrir markvörð.
Hannes sagði að leikmenn liðsins hefðu farið þetta á hnefanum síðustu daga eftir tapið gegn Ungverjum og felldi tár þegar hann fór að hugsa til baka og í framtíðina.
„Þetta tók mjög á okkur þessi Ungverja leikur, það er búið að taka á að rífa okkur aftur í gang. Það er eins og hafi maður farið þetta á hnefanum, tilfinningarnar eru að koma út núna. Mögulega síðasti leikur hjá mörgum sem hafa spilað saman lengi.“
Hannes bað svo um að viðtalið yrði ekki lengra, hann vildi tíma til að átta sig á stöðu mála en það má sjá hér að neðan.