„Knattspyrnukonan Gunnhildur Yrsa Jónsdóttir er einn uppáhaldsíþróttamaðurinn minn, ekki aðeins innan vallar heldur utan hans líka,“ Það er svona sem pistill blaðamannsins Jóhanns Inga Hafþórssonar á Morgunblaðinu byrjar í blaði dagsins.
Gunnhildur Yrsa var frábær í liði Vals sem vann HJK Helsinki í Meistaradeildinni í gær og er liðið komið í pottinn þegar dregið er í næstu umferð.
„Gunnhildur er grjóthörð á vellinum, hendir sér í tæklingar og er afar skemmtilegt að fylgjast með henni. Hún gefur aldrei tommu eftir. Þá er Gunnhildur mjög fjölhæf og getur spilað bæði á miðjunni og sem hægri bakvörður.“
„Það má segja að hún sé svolítið vanmetin, en sóknarmenn landsliðsins stela oftast fyrirsögnunum á meðan hún vinnur erfiðisvinnuna þar fyrir aftan. Leikurinn gegn Svíþjóð í síðasta mánuði var 74. landsleikur Gunnhildar og er ljóst að hún hefur lagt líf og sál í öll sín verkefni í landsliðstreyjunni.“
Jóhann hreifst af spilamennsku Gunnhildar á Hlíðarenda í gær en hún er í láni hjá félaginu frá Utah í Bandaríkjunum.
„Gunnhildur átti stórleik í 3:0-sigri Vals á HJK Helsinki í Meistaradeildinni í gær og sýndi enn og aftur að hún er ein besta knattspyrnukona landsins.“
„Grjóthörð á vellinum en virkar síðan ljúf sem lamb utan hans,“ skrifar Jóhann í Morgunblaðið.
