Íslenska karlalandsliðið í knattspyrnu er nú aðeins einu skrefi frá því að komast inn á sitt þriðja stórmót í röð. Liðið vann 2-1 sigur á Rúmeníu í umspili um laust sæti á EM í Laugardalnum í kvöld. Liðið mætir Ungverjalandi ytra í nóvember í hreinum úrslitaleik.

Gylfi Þór Sigurðsson skoraði bæði mörk Íslands í fyrri hálfleik en Rúmenar fengu gefins vítaspyrnu í þeim síðari en settu litla pressu á íslenska markið eftir það.

Fyrra mark Gylfa kom á 16 mínútu en eftir sendingu frá Jóhanni Berg Guðmundssyni, snéri Gylfi á leikmann Rúmena og hamraði honum í netið.

Alfreð Finnbogason vippaði svo boltanum inn á Gylfa í því síðara og hann kláraði frábærlega.

Einkunnir eru hér að neðan.

Byrjunarlið Íslands:

Hannes Þór Halldórsson 7
Steig ekki feilspor í leiknum en hafði líka lítið að gera

Guðlaugur Victor Pálsson 9
Gjörsamlega frábær í leiknum, öflugur í loftinu og stóð vaktina með eindæmum vel í vörninni. Búinn að festa sig í sessi.

Kári Árnason 8
Leiðtogi varnarinnar var í sínu besta formi þrátt fyrir að vera að stíga upp úr meiðslum.

Ragnar Sigurðsson 8
Stóð sig frábærlega og fann sig vel með sínum besta samherja, Kára.

Hörður Björgvin Magnússon 7
Komst mjög vel frá sínu og virðist vera að eigna sér stöðuna á nýjan leik.

Birkir Bjarnason 7
Hélt miðsvæðinu vel með Aroni Einari og kom boltanum vel frá sér.

Aron Einar Gunnarsson 7
Öflugur á miðsvæðinu og lét höggið sem hann fékk í fyrri hálfleik ekki hafa áhrif á sig.

Jóhann Berg Guðmundsson (´83) 8
Það góða sóknarlega í fyrri hálfleik innihélt yfirleitt Jóhann og Gylfa, lagði upp fyrsta mark Íslands.

Gylfi Þór Sigurðsson 9 – Maður leiksins
Orð eru óþörf, mörkin tala sínnu máli. Kláraði bæði færin af heimsklassa.

Arnór Ingvi Traustason 7
Gríðarleg vinnsla og vann sig heldur betur inn í leikinn.

Alfreð Finnbogason (´75) 8
Var mjög öflugur, varnarlega var hann fyrsti maður i pressu og stoðsendingin á Gylfa var frábær.