Rúnar Alex Rúnarsson spilaði allan leikinn í marki Arsenal í öruggum 3-0 sigri gegn Dundalk í Evrópudeildinni í gær. Arsenal gerði út um leikinn á nokkurra mínútna kafla. Edward Nketiah skoraði fyrsta mark leiksin á 42. mínútu. Annað mark Arsenal skoraði Joseph Willock á 44. mínútu. Arsenal gátu gengið sáttir til hálfleiks.

Þeir byrjuðu síðari hálfleik af krafti. Þriðja mark Arsenal kom á 46. mínútu. Þar var að verki Nicolas Pépé. Fleiri mörk voru ekki skoruð og Rúnar Alex getur fagnað góðum sigri í sínum fyrsta leik með Arsenal. Arsenal er með fullt hús stiga eftir tvo leiki. Rúnar Alex hafði ekki mikið að gera í leiknum en fær fína dóma í enskum blöðum fyrir frumraun sína. „Það er ólíklegt að Rúnar muni hafa minna að gera í næsta leik, þessi íslenski landsliðsmaður var að spila sinn fyrsta leik og það reyndi lítið á hann,“ skrifar London Evening Standard sem gefur Rúnari sex í einkunn.

Útvarpsstjórinn Stefán Eiríksson horfði spenntur á leikinn og rifjaði upp skemmtilega sögu þegar hann lék jólasvein í Belgíu fyrir um 20 árum síðan, þar bjó Rúnar Alex en faðir hans Rúnar Kristinsson lék þá með Lokeren þar í landi.

„Jólin 2000 lék ég jólasvein á jólafögnuði Íslendinga í Belgíu. Það gekk vel að því frátöldu að einn lítill strákur varð skelfingu lostinn þegar jólasveinninn birtist,“ skrifaði útvarpsstjórinn um málið á Twitter.

Drengurinn sem varð hræddur við jólasveininn var Rúnar Alex. „20 árum síðar er Rúnar ALex að leika sinn fyrsta leik með Arsenal, ómeðvitaður um það sem fram kemur á myndinni.“

Færslu Stefáns má sjá hér að neðan.

Jólin 2000 lék ég jólasvein á jólafögnuði Íslendinga í Belgíu. Það gekk vel að því frátöldu að einn lítill strákur varð skelfingu lostinn þegar jólasveinninn birtist. 20 árum síðar er @runaralex að leika sinn fyrsta leik með Arsenal, ómeðvitaður um það sem fram kemur á myndinni. pic.twitter.com/gqMj4oLzn0

— Stefán Eiríksson (@StefanEiriks) October 29, 2020

Enski boltinn á 433 er í boði