„Meistarar! Það tókst!,“ skrifar Davíð Smári Lamude þjálfari Kórdrengja í 2. deild karla en liðið hefur nú tryggt sér sæti í Lengjudeildinni að ári. Árangur liðsins á síðustu árum í íslenskum fótbolta er hreint magnaður.
Liðið komst upp úr 4. deild karla sumarið 2018 og 3. deild karla sumarið 2019. LIðið var svo efsta lið 2. deildar karla þegar mótið var blásið af í dag af stjórn KSÍ. Kórdrengir hafa því farið upp um þrjár deildir á þremur árum, einstakt afrek.
„Gríðarlega krefjandi og skemmtilegu keppnistímabili er nú lokið og árangurinn er fordæmalaus. Þvílíkt lið og liðsheild sem við erum,“ skrifar Davíð um stöðu mála á Facebook síðu sinni í kvöld.
Davíð er lítt reyndur þjálfari en hefur náð ótrúlegum árangri með Kórdrengi og það hefur vakið mikla athygli. „Það er ekkert nema heiður að fá að starfa með þessum leikmönnum mínum ásamt Andra meðþjálfara og er ég þeim ólýsanlega þakklátur. Fórnfýsi dugnaður og metnaður fyrir þessu verkefni hjá þeim nær engum endi! Stjórn liðsins á líka skilið hrós, þar er metnaðurinn engu minni.“
Kórdrengir er lítill klúbbur en Davíð Smári segir samstöðuna ótrúlega. „Ég held það geri sér fáir grein fyrir stærð klúbbsins eða öllu heldur smæð, þetta er allt svo persónulegt og beint frá hjartanu í öllum þeim sem hér eru. Að kalla okkur fjölskylduklúbb er ekki nægilega lýsandi en þó í áttina! Þetta gekk vonum framar en við heldur betur lögðum inn fyrir því. Endalaus vinna og við uppskárum. Við eigum inni fögnuðinn!“
